కాంతార’ హీరో రిషబ్ శెట్టి సక్సెస్ సీక్రెట్.. పేరు మార్పు వెనుక ఆసక్తికర కథ!

‘కాంతార’ చిత్రంతో దేశవ్యాప్తంగా సంచలనం సృష్టించిన నటుడు, దర్శకుడు రిషబ్ శెట్టి తన విజయం వెనుక ఉన్న ఓ ఆసక్తికరమైన రహస్యాన్ని పంచుకున్నారు. ప్రస్తుతం ఆయన దర్శకత్వంలోనే వచ్చి, అక్టోబర్ 2న విడుదలైన ‘కాంతార: చాప్టర్ 1’ చిత్రం ఘన విజయం సాధించిన సందర్భంగా వరుస ఇంటర్వ్యూలలో పాల్గొంటున్నారు. ఈ క్రమంలో, తన అసలు పేరు రిషబ్ శెట్టి కాదని, సినీ రంగంలో రాణించడం కోసమే పేరు మార్చుకున్నానని ఆయన వెల్లడించారు.

తన అసలు పేరు ప్రశాంత్ అని, అయితే జ్యోతిష్యంలో ప్రావీణ్యం ఉన్న తన తండ్రి సూచన మేరకే ‘రిషబ్’గా మార్చుకున్నానని రిషబ్ శెట్టి తెలిపారు. "నాన్న నా జాతకాన్ని పరిశీలించి, రిషబ్ అనే పేరు పెట్టుకుంటే అదృష్టం కలిసి వస్తుందని చెప్పారు. ఆయన సలహాతోనే అలా చేశాను. నిజంగానే పేరు మార్చుకున్న తర్వాత నా జీవితంలో మార్పు రావడం మొదలైంది" అని ఆయన వివరించారు. కెరీర్ ప్రారంభంలో అందరిలాగే తాను కూడా ఎన్నో ఇబ్బందులు ఎదుర్కొన్నానని, అయితే పేరు మార్పు తర్వాతే తన దశ తిరిగిందని ఆయన పేర్కొన్నారు.

రిషబ్ శెట్టి స్వీయ దర్శకత్వంలో, రుక్మిణి వసంత్ హీరోయిన్‌గా నటించిన ‘కాంతార: చాప్టర్ 1’ చిత్రం బాక్సాఫీస్ వద్ద ప్రభంజనం సృష్టిస్తోంది. విడుదలైన కేవలం రెండు వారాల్లోనే ఈ సినిమా రూ. 700 కోట్లకు పైగా వసూళ్లు సాధించి భారతీయ సినీ పరిశ్రమను ఆశ్చర్యపరిచింది. కన్నడతో పాటు తెలుగు, హిందీ, ఇతర భాషల్లోనూ విడుదలై విశేష ఆదరణ పొందింది. ఈ సినిమాతో తనకు దేశవ్యాప్తంగా వచ్చిన గుర్తింపు వెనుక తన తండ్రి సలహా, పేరు మార్పు కూడా కీలక పాత్ర పోషించాయని రిషబ్ శెట్టి చెప్పుకొచ్చారు.